Shavkat Mirziyoyev tegishli qarorni imzoladi. Hujjatga koʻra:

- Institutda taʼlim faoliyati 2021/2022 oʻquv yilidan boshlanib, taʼlim davlat granti hamda toʻlov-kontrakt asosida amalga oshiriladi;

- 2022/2023 oʻquv yilidan boshlab, bakalavriatda 2 ta yangi taʼlim yoʻnalishi (bastakorlik sanʼati, sanʼatshunoslik: musiqashunoslik) va magistraturada 2 ta yangi mutaxassislik (ovoz rejissyorligi: musiqiy ovoz rejissyorligi, musiqa sanʼati) ochiladi;

- Konservatoriyada hozirda tahsil olayotgan bakalavriatning 2–4 kurs va magistraturaning 2-kurs talabalari oʻqishini Institutda davom ettiriladi.

Institutning asosiy vazifalari belgilanmoqda, jumladan:

- yuqori malakali mutaxassislar va ilmiy-pedagog kadrlarni tayyorlash;

- milliy estrada yoʻnalishida zamonaviy ijro namunalarining “Oltin fondi”ni yaratish hamda ularni notaga koʻchirish va amaliyotga keng joriy etish;

- milliy estrada yoʻnalishi boʻyicha fundamental, amaliy va ijodiy izlanish hamda tadqiqotlar olib borish.

2022/2023 oʻquv yilidan boshlab bolalar musiqa va sanʼat maktablari (324 ta), ixtisoslashtirilgan sanʼat va madaniyat maktablari (17 ta), maktab-internatlar (8 ta) hamda madaniyat, musiqa va sanʼat kollejlariga (2 ta) Institutning yetakchi professor-oʻqituvchilari hamda mamlakatimizda ijod qilib kelayotgan taniqli estrada ijodkorlari biriktiriladi hamda “Mahorat darslari” yoʻlga qoʻyiladi.