Arxiv foto

Yaqinda Moskva shahrida Pediatriya va bolalar xirurgiyasi ilmiy-tadqiqot klinik instituti tomonidan “Pediatriya va bolalar xirurgiyasida innovatsion texnologiyalar” mavzuida kongress oʻtkazildi.

Bolalar kasalliklarining diagnostikasi, ularni davolash hamda oldini olish sohasidagi soʻnggi ilmiy ishlanmalar, shuningdek, davolashning anʼanaviy va zamonaviy usullari muhokama etilgan ushbu ilmiy anjumanda Samarqand davlat tibbiyot universiteti vakillari ham qatnashdi.

Tadbir doirasida Samarqand davlat tibbiyot universiteti 1-son bolalar xirurgiyasi kafedrasi professori Azamat Shamsiyevga Rossiyada xizmat koʻrsatgan fan arbobi A. Kisel nomidagi “Bolalar vrachi ustozi” mukofoti berildi.

Aytish joizki, mazkur mukofot hozirgi kungacha faqat rossiyalik bolalar jarrohlariga berilgan. A. Shamsiyev mazkur mukofot bilan taqdirlangan ilk xorijlik olim boʻldi.

Maʼlumot uchun, ayni paytga qadar professor A. Shamsiyev Rossiyaning akademik A. Vishnevskiy nomidagi oltin medal sohibi, shuningdek, professor V. Nemsadze mukofoti sovrindori boʻlgan.

“Xalq soʻzi”.