Kecha, 14-oktyabr kuni Osiyo mintaqasida Jahon chempionati saralashining toʻrtinchi bosqichining soʻnggi tur oʻyinlari boʻlib oʻtdi. Unga koʻra, Saudiya Arabistoni va Qatar terma jamoalari Jahon chempionatiga yoʻl oldi.

Qatar terma jamoasi ushbu bosqichning dastlabki oʻyinida Ummon Sultonligi terma jamoasi bilan durang oʻynab, imkoniyatlarini ancha pasaytirib yuborgan edi. Ammo, soʻnggi bahsda Lopetegi shogirdlari guruhdagi asosiy raqibi Birlashgan Arab Amirliklari terma jamoasini magʻlub etishni uddaladi va shu tariqa 4 ochko bilan guruhda 1-oʻrinni egallagan holda Jahon chempionati yoʻllanmasiga ega chiqdi.

Saudiya Arabistoni terma jamoasi esa dastlabki oʻyinda Indoneziyani 3:2 hisobi bilan magʻlub etgandi. Kecha jamoa guruhdagi asosiy raqibi Iroq termasi bilan 0:0 hisobi bilan durang oʻynadi. Oʻz navbatida Iroq terma jamoasi Indoneziyani 1:0 hisobi bilan magʻlub etgandi. Shu boisdan urilgan goʻllar soni koʻpligi sabab Saudiya Arabistoni terma jamoasi Jahon chempionatiga yoʻl oldi.

Maʼlumot uchun, Osiyoda Jahon chempionati saralashining soʻnggi bosqichi noyabr oyida boʻlib oʻtadi. Unda Iroq va Birlashgan Arab Amirliklari terma jamoalari yana bitta yoʻllanma uchun kurash olib boradi.