Illyustrativ foto

Tizza va son boʻgʻimlarining osteoartriti boʻlgan ayollarda qonda selen, sink, temir va vanadiy miqdori kamayadi. Bunday xulosaga rossiyalik va xitoylik olimlar hamkorligida oʻtkazilgan tadqiqot yakunida kelindi.

Uch yuz nafardan ortiq ayollarning sogʻligʻi boʻyicha maʼlumotlarning tahlili shuni koʻrsatdiki, osteoartrit sabab qondagi selen va sink darajasi oʻrtacha 7-9, temir esa 18 foizgacha kamayadi. Tizza va son boʻgʻimlari shikastlangan bemorlarda kamayishlar yaqqol namoyon boʻlgan.

Yosh, ortiqcha vazn va surunkali kasalliklar kabi omillarni hisobga olgan holda, selen va vanadiyning kamayishi ham osteoartrit bilan statistik jihatdan ahamiyatli munosabatni saqlab qoldi. Olimlarning fikricha, bu elementlar boʻgʻinlarni himoya qilishda muhim rol oʻynaydi.

Mualliflarning fikriga koʻra, mikroelementlar etishmasligi oksidlovchi stressni va boʻgʻim toʻqimalarida yalligʻlanish reaksiyasini kuchaytirishi mumkin va shu bilan kasallikning rivojlanishiga yordam beradi. Olingan maʼlumotlar osteoartritning oldini olish va erta tashxislash uchun yangi yondashuvlar uchun asos boʻlishi mumkin.

Tadqiqotchilarning taʼkidlashicha, mikronutriyentlarni qabul qilishning shaxsiy rejimlari yordamida yetishmovchilikni tuzatish kasallikning rivojlanishini sekinlashtirishi mumkin. Biroq, bu farazni tasdiqlash uchun koʻproq koʻngillilar ishtirokida qoʻshimcha sinovlar oʻtkazish kerak.