Иллюстратив фото

Тизза ва сон бўғимларининг остеоартрити бўлган аёлларда қонда селен, цинк, темир ва ванадий миқдори камаяди. Бундай хулосага россиялик ва хитойлик олимлар ҳамкорлигида ўтказилган тадқиқот якунида келинди.

Уч юз нафардан ортиқ аёлларнинг соғлиғи бўйича маълумотларнинг таҳлили шуни кўрсатдики, остеоартрит сабаб қондаги селен ва цинк даражаси ўртача 7-9, темир эса 18 фоизгача камаяди. Тизза ва сон бўғимлари шикастланган беморларда камайишлар яққол намоён бўлган.

Ёш, ортиқча вазн ва сурункали касалликлар каби омилларни ҳисобга олган ҳолда, селен ва ванадийнинг камайиши ҳам остеоартрит билан статистик жиҳатдан аҳамиятли муносабатни сақлаб қолди. Олимларнинг фикрича, бу элементлар бўғинларни ҳимоя қилишда муҳим роль ўйнайди.

Муаллифларнинг фикрига кўра, микроэлементлар этишмаслиги оксидловчи стрессни ва бўғим тўқималарида яллиғланиш реакциясини кучайтириши мумкин ва шу билан касалликнинг ривожланишига ёрдам беради. Олинган маълумотлар остеоартритнинг олдини олиш ва эрта ташхислаш учун янги ёндашувлар учун асос бўлиши мумкин.

Тадқиқотчиларнинг таъкидлашича, микронутриентларни қабул қилишнинг шахсий режимлари ёрдамида етишмовчиликни тузатиш касалликнинг ривожланишини секинлаштириши мумкин. Бироқ, бу фаразни тасдиқлаш учун кўпроқ кўнгиллилар иштирокида қўшимча синовлар ўтказиш керак.