Bugun Oliy Majlis Senati Raisining birinchi oʻrinbosari S.Safoyevning Yaponiyaning mamlakatimizdagi Favqulodda va muxtor elchisi Yoshinori Fudjiyama bilan uchrashuvi boʻlib oʻtdi.

Soʻnggi yillarda Oʻzbekiston hamda Yaponiya ikki tomonlama va koʻp qirrali oʻzaro manfaatli hamkorlikni rivojlantirishda salmoqli natijalarga erishmoqda. Oʻzbekiston Prezidentining 2019-yilda kunchiqar yurtga tashrifi ikki tomonlama munosabatlarni yangi taraqqiyot bosqichiga olib chiqdi.

Uchrashuvda mamlakatlarimiz oʻrtasidagi savdo-iqtisodiy, siyosat, taʼlim, madaniy, gumanitar sohalarda strategik hamkorlik munosabatlari, parlamentlararo aloqalar bilan bir qatorda ilm-fan, taʼlim va innovatsiyalar boʻyicha hamkorlik ham jadal rivojlanayotgani qayd etildi.

Xususan, Jahon iqtisodiyoti va diplomatiya universitetining ilmiy va oʻquv jarayoni ham ikki mamlakat munosabatlarining faollashuvida ishtirok etishga qaratilgan. Taʼlim dargohida Yaponiyaning nufuzli universitetlari bilan talabalar almashish dasturlari muvaffaqiyatli amalga oshirilmoqda. Yaponiyaning Nagoya, Sukuba, Xokkaydo, Vaseda, Vakayama kabi 5 ta universiteti bilan hamkorlik oʻrnatilgan. Bundan tashqari, Jahon iqtisodiyoti va diplomatiya universitetida Yaponiya tadqiqotlari tahliliy markazi faoliyat koʻrsatmoqda.

Tomonlar 2022-yilda mamlakatlar oʻrtasida diplomatik munosabatlar oʻrnatilganining 30 yilligini nishonlash doirasida “Yaponiyada Oʻzbekiston yili” va “Oʻzbekistonda Yaponiya yili”ni hamkorlikda oʻtkazishga tayyorgarlik koʻrish boʻyicha tayyor ekanini bildirdi.

Shuningdek, uchrashuv doirasida Oliy Majlis Senati Raisining birinchi oʻrinbosari Sodiq Safoyevga ikki tomonlama aloqalarni yanada chuqurlashtirish hamda Oʻzbekiston va Yaponiya oʻrtasidagi doʻstona munosabatlarni rivojlantirish yoʻlidagi koʻp yillik samarali xizmatlari uchun Yaponiya imperatorining oliy mukofoti “Chiqayotgan quyosh Katta Kordon ordeni” (Grand Cordon of the Order of the Rising Sun) bilan taqdirlangani munosabati bilan Yaponiya tashqi ishlar vaziri Tosimitsu Motegining yoʻllagan tabrik xati topshirildi.