Oliy Majlis Senati Raisi Tanzila Narbayeva Birlashgan Millatlar Tashkilotining Aholishunoslik boʻyicha jamgʻarmasi (UNFPA)ning Sharqiy Yevropa va Markaziy Osiyo boʻyicha mintaqaviy direktori Florens Bauer bilan uchrashuv oʻtkazdi.

Muloqot mobaynida Oʻzbekistonda amalga oshirilayotgan islohotlar, demografik tendensiyalar, kambagʻallikka qarshi kurashish, gender tenglik, mehnat migratsiyasi va UNFPA bilan hamkorlikdagi loyihalar muhokama qilindi.

Florens Bauer xonim Namangan viloyatida Prezidentimiz boshchiligida “Kambagʻallikdan farovonlik sari” xalqaro forumi muvaffaqiyatli oʻtkazilganini alohida taʼkidladi. Xususan, Barqaror rivojlanish maqsadlari orasida kambagʻallikka qarshi kurashish birinchi oʻrinda turishini qayd etib, bu borada mamlakatimizda amalga oshirilayotgan tashabbuslarni yuqori baholadi.

Taʼkidlanganidek, soʻnggi yillarda “Oʻzbekiston – 2030” strategiyasi doirasida siyosiy, ijtimoiy va iqtisodiy sohalarda keng qamrovli islohotlar amalga oshirilmoqda, inson huquqlari, demokratik jarayonlar va barqaror rivojlanishni taʼminlash borasida sezilarli natijalarga erishilmoqda.

UNFPA tomonidan aholini roʻyxatga olishga tayyorgarlik koʻrish, demografik tahlil, reproduktiv sogʻliq va gender tenglikni taʼminlash boʻyicha faol hamkorlik olib borilmoqda.

Uchrashuv yakunida tomonlar hamkorlikni yanada kengaytirish, aholi farovonligini taʼminlash va Barqaror rivojlanish maqsadlariga erishishda umumiy saʼy-harakatlarini davom ettirishga kelishib oldi.