Ayni kunlarda Gretsiyaning Iraklion shahrida ogʻir atletika boʻyicha yoshlar oʻrtasida Jahon chempionati boʻlib oʻtayotganidan xabaringiz bor. Kecha oʻgʻil bolalar oʻrtasida -73 kg. vazndagi bahslar oʻtkazildi va unda hamyurtimiz Ogʻabek Toʻxtayev ham munosib ishtirok etdi.

Dast koʻtarish mashqida Ogʻabek dastlabki urinishida 133 kg. toshni koʻtargan boʻlsa, keyingi urinishida 136 kg. toshni oʻziga boʻysindirdi. Biroq, soʻnggi urinishda sportchimizga 139 kg. tosh ogʻirlik qildi.

Siltab koʻtarish mashqida esa hamyurtimiz oʻzining barcha urinishlaridan samarali foylandi va oʻz ishtirokini 177 kg. natija bilan yakunladi.

Ikkikurashda koʻra umumiy hisobda 313 kg. natija qayd etgan Ogʻabek Toʻxtayev yakunda 4-oʻrin bilan cheklandi. Shunday boʻlsada, ushbu jahon chempionati yosh sportichimiz uchun katta tajriba maktabi vazifasini oʻtashiga ishonamiz.

Jahon chempionatida kuchli uchlik esa quyidagicha koʻrinish oldi:

Yoshlar oʻrtasidagi Jahon chempionati.

Oʻgʻil bolalar, -73 kg. vazn toifasi

1. Rizqi Juniansyah (Indoneziya) – umumiy 341 kg. (dast koʻtarish – 156 (rekord) + siltab koʻtarish – 185 kg.);

2. Aleksey Churkin (Qozogʻiston) – 329 (146 + 183) kg.;

3. Rayan Grimsland (AQSH) – 327 (145 + 182) kg.;

4. Ogʻabek Toʻxtayev (Oʻzbekiston) – 313 (136 + 177) kg.