Odam savdosi jinoyatini sodir etib Turkiyada yashirinib yurgan Oʻzbekistonlik ayol Toshkentga ekstraditsiya qilindi. Bu haqida Oʻzbekiston Respublikasining Istanbul shahridagi Bosh konsulxonasi xabar berdi.

Xabarda aytilishicha, Oʻzbekiston Respublikasidagi Interpol milliy markaziy byurosi xodimlari kuzatuvida, Interpol kanallari orqali huquqni muhofaza qiluvchi organlarimiz tomonidan odam savdosi uchun qidirilayotgan va uzoq vaqt davomida Turkiya hududida yashirinib yurgan Oʻzbekiston fuqarosi Istanbuldan Toshkentga ekstraditsiya qilingan.

Maʼlum qilinishicha, jinoyatchi ayol sotish va ekspluatatsiya maqsadida qizlarga yuqori maosh vaʼda qilib, ularni Turkiyaga olib kelgan. Shundan soʻng, qizlarning pasportlarini tortib olib, ularni fohishalik bilan shugʻullanishga majburlagan.

“Ikki davlatning Interpol milliy markaziy byurolari oʻrtasidagi hamjihatlik va tezkor hamkorliklari tufayli muvaffaqiyatli qoʻshma faoliyatning ibratli namunasi yuzaga keldi”, — deyiladi Bosh konsulxona xabarida.

Bildirilishicha, ayni vaqtda Oʻzbekiston va Turkiya huquqni muhofaza qiluvchi organlari tomonidan bu kabi jinoyatlarni fosh qilish boʻyicha faol harakatlar amalga oshirilmoqda.