Foto: White HouseFlickr.com Global Look Press

AQSH prezidenti Donald Tramp kelasi hafta Rossiya rahbari Vladimir Putin bilan shaxsiy uchrashuv oʻtkazishni rejalashtirmoqda. Bu haqda The New York Times xabar berdi.

Nashr manbasiga koʻra, Tramp oʻz rejalarini Yevropaning bir necha yetakchilari bilan telefon orqali muloqoti chogʻida maʼlum qilgan.

Maʼlumotlarga koʻra, AQSH prezidenti ushbu uchrashuvdan soʻng uch tomonlama muzokaralar oʻtkazish niyatida: unda Trampning oʻzi, Vladimir Putin va Ukraina prezidenti Vladimir Zelenskiy qatnashishi kutilmoqda.

Nashr taʼkidlashicha, ushbu uchrashuvlarda faqatgina Tramp, Putin va Zelenskiy ishtirok etadi. Yevropa yetakchilari muzokaralarga taklif etilmagan.

Eslatib oʻtamiz, kecha Moskvada Vladimir Putin AQSH prezidentining maxsus vakili Stiv Uitkoff bilan uchrashuv oʻtkazdi. Uchrashuv qariyb uch soat davom etgan. Donald Tramp buni “samarali muzokara” deb atagan va “muxim ildamlashuv” qayd etilganini taʼkidlagan.

Fox News maʼlumotiga koʻra, uchrashuv chogʻida Putin Tramp bilan “maʼqul vaqtda” uchrashish istagini bildirgan. Bu xabar Uitkoff orqali Trampga yetkazilgan.

Ushbu muzokaralar Tramp Rossiyaga qoʻygan ultimatum muddati yaqinlashgan paytda boʻlib oʻtmoqda. AQSH prezidenti 8-avgustgacha harbiy harakatlarni toʻliq toʻxtatishni talab qilgan. Aks holda, Rossiyaga nisbatan ikkilamchi sanksiyalar joriy etilishi mumkinligini aytgan.