Yaponiyada O‘zbekiston madaniyati va san’ati kunlari boshlandi. Mazkur tadbirda ishtirok etish uchun o‘zbekistonlik bir guruh san’atkorlar Tokioga yo‘l olishdi. Vakillarimiz 22 mayga qadar kunchiqar mamlakatning Tokio, Nagoya, Osaka shaharlarida bo‘lib o‘tadigan madaniy-ma’rifiy tadbirlarda ishtirok etishadi. 

— Tadbir, avvalo, “Ko‘hna va navqiron O‘zbekiston” xujjatli filmi taqdimoti bilan boshlandi, — deydi Madaniyat vazirligi matbuot xizmati rahbari Mavluda Asqarxo‘jayeva. — Filmida mamlakatimizning eng go‘zal maskanlari, tarixiy obidalar, zamonaviy inshootlar, shuningdek, urf-odat va an’analar namoyon etilgan bo‘lib, u ming yillik madaniyatimiz bilan bir qatorda, bugungi turistik salohiyatini ham namoyish etadi. 

Tadbirning ilk kuniyoq Kunchiqar mamlakat sahnasida yangragan O‘zbekiston xalq artistlari Munojot Yo‘lchiyeva, Zulayho Boyxonova ijrosidagi “Charog‘on O‘zbekistonim!”, “Mustahzod”, “Bo‘lmasa bo‘lmas” singari qo‘shiqlari, xalqaro tanlovlar g‘oliblari Umid Isroilov, Farangiz Shamsiyeva, Rohila Ro‘zimova, Anvar Sobirov, “Surxon” guruhi, “Mumtoz navo”, “Gavhar” raqs ansamblarining chiqishlari mezbonlarda katta taassurot qoldirdi. 
M. XOLMATOVA