Foto: “Dunyo”

Misr hukumati tomonidan Oʻzbekistonga insonparvarlik yordami sifatida ajratilgan “Sofosbuvir-400 mg” dori vositasining joriy yildagi toʻrtinchi partiyasi Toshkentga yetkazildi. Mazkur partiya “Uzbekistan Airways” aviakompaniyasi tomonidan Sharm-al-Shayxdan Toshkentga olib kelindi. Bu haqda “Dunyo” axborot agentligi xabar berdi.

Maʼlum qilinishicha, Misr hukumati yordamining joriy yildagi 4-partiyasi umumiy 32 qutidan iborat boʻlib, ular 7680 dona “Sofosbuvir-400 mg” dori vositalarini oʻz ichiga oladi.

Mazkur dori vositalari Oʻzbekistonda gepatit “C”ni 2030-yilga qadar bartaraf etish boʻyicha milliy dastur ijrosi doirasida Sogʻliqni saqlash vazirligi huzuridagi Virusologiya ilmiy-tekshirish instituti tomonidan shifotalab bemorlarga taqsimlanadi.

Oʻzbekiston elchixonasi maʼlumotiga koʻra, Misr hukumati tomonidan 2023-2024-yillar davomida ushbu virusga qarshi vazni 12,4 tonna boʻlgan “Daclatasvir” va “Sofosbuvir” dori vositalarining 27 ta partiyasi mamlakatimizga yetkazib berilgan. Taʼkidlanishicha, ushbu dori vositalarining umumiy qiymati 1,4 million dollarga teng.