“Isteʼdodli yoshlarni qoʻllab-quvvatlash “Ulugʻbek” jamgʻarmasi faoliyatini rivojlantirish chora-tadbirlari toʻgʻrisida”gi Hukumat qarori (30-son, 18.01.2022-y.) qabul qilindi.

Qarorga koʻra, 2022-yildan boshlab har yili “Mirzo Ulugʻbek vorislari” respublika tanlovi oʻtkaziladi.

Tanlovning:

— 1-bosqichi fevral–mart oylarida tuman (shahar)larda oʻtkazilib, unda eng yuqori natijaga erishgan har bir tuman (shahar)dan 5 nafardan nomzod keyingi bosqichga oʻtadi;

— 2-bosqichi aprel oyida Qoraqalpogʻiston Respublikasi, viloyatlar va Toshkent shahrida oʻtkazilib, ularning har biridan eng yuqori natijaga erishgan 20 nafar yosh navbatdagi bosqichga yoʻllanma oladi;

— 3-bosqichi may oyida boʻlib oʻtadi hamda 100 nafar yosh tanlov gʻolibi deb topiladi.

1-, 2- va 3-bosqichlar gʻoliblari tegishli BHMning 5, 10 va 20 baravari miqdorida bir martalik pul mukofoti va diplom bilan taqdirlanadi.

Respublika bosqichi gʻoliblari Jamgʻarma tomonidan tashkil etiladigan maqsadli oʻquv kurslarida bepul tahsil oladi.

Shuningdek, qaror bilan “Isteʼdodli yoshlar axborotnomasi” ilmiy-amaliy elektron jurnali hamda “Mirzo Ulugʻbek vorislari” elektron portali tashkil etiladi.

Bunda elektron portalda isteʼdodli yoshlarning elektron bazasi shakllantiriladi, oʻquv kurslari bitiruvchilarining reytingi joriy etilib, innovatsion gʻoyalari va ilmiy-texnik ishlanmalari baholab boriladi.