19-dekabr kuni Prezident Administratsiyasi rahbari Saida Mirziyoyeva oʻgʻli Shavkatjon bilan birga “Sehrlandiya: Qahramonlar missiyasi” multfilmining premyerasida ishtirok etdi. Tomoshabinlar zalida qariyb ikki ming nafar bola jam boʻldi.

Qayd etilishicha, tomoshabinlar ilk daqiqalardanoq ekrandagi voqealarga toʻliq shoʻngʻib ketgan — bolalar syujetga samimiy munosabat bildirib, qahramonlar bilan birga quvonib, birga hayajonlangan. Saida Mirziyoyevaning taʼkidlashicha, aynan shunday faol ishtirok multfilm ijodkorlari oʻz auditoriyasiga yoʻl topa olganini koʻrsatadi.

U bolani aldash mumkin emasligini, u samimiylikni darhol his qilishini qayd etdi. Agar bolalar ekrandan koʻz uzmay tomosha qilayotgan boʻlsa, demak, loyihaga nafaqat texnologiya, balki qalb ham jo etilgan.

“Sehrlandiya: Qahramonlar missiyasi” Oʻzbekiston tarixida ilk bor 3D formatda yaratilgan toʻliq metrajli animatsion film hisoblanadi. Loyiha milliy animatsiya rivoji uchun muhim qadam sifatida baholanmoqda.

“Ona sifatida aytaman: bolalarimiz oʻz tilida, oʻz ruhiyatiga yaqin, zamonaviy multfilmlarni koʻrib ulgʻayishi juda muhim”, — dedi Prezident Administratsiyasi rahbari.

Shuningdek, Saida Mirziyoyeva loyiha muallifi Jahongir Ahmedov va butun ijodiy jamoaga minnatdorlik bildirib, qoʻlga kiritilgan natijalar bilan cheklanmasdan, yangi marralar sari intilishni tiladi.