19 декабрь куни Президент Администрацияси раҳбари Саида Мирзиёева ўғли Шавкатжон билан бирга «Сеҳрландия: Қаҳрамонлар миссияси» мультфильмининг премьерасида иштирок этди. Томошабинлар залида қарийб икки минг нафар бола жам бўлди.

Қайд этилишича, томошабинлар илк дақиқаларданоқ экрандаги воқеаларга тўлиқ шўнғиб кетган — болалар сюжетга самимий муносабат билдириб, қаҳрамонлар билан бирга қувониб, бирга ҳаяжонланган. Саида Мирзиёеванинг таъкидлашича, айнан шундай фаол иштирок мультфильм ижодкорлари ўз аудиториясига йўл топа олганини кўрсатади.

У болани алдаш мумкин эмаслигини, у самимийликни дарҳол ҳис қилишини қайд этди. Агар болалар экрандан кўз узмай томоша қилаётган бўлса, демак, лойиҳага нафақат технология, балки қалб ҳам жо этилган.

«Сеҳрландия: Қаҳрамонлар миссияси» Ўзбекистон тарихида илк бор 3D форматда яратилган тўлиқ метражли анимацион фильм ҳисобланади. Лойиҳа миллий анимация ривожи учун муҳим қадам сифатида баҳоланмоқда.

«Она сифатида айтаман: болаларимиз ўз тилида, ўз руҳиятига яқин, замонавий мультфильмларни кўриб улғайиши жуда муҳим», — деди Президент Администрацияси раҳбари.

Шунингдек, Саида Мирзиёева лойиҳа муаллифи Жаҳонгир Аҳмедов ва бутун ижодий жамоага миннатдорлик билдириб, қўлга киритилган натижалар билан чекланмасдан, янги марралар сари интилишни тилади.