Argentinalik taniqli futbol murabbiyi Maurisio Pochettino AQSHning futbol boʻyicha erkaklar terma jamoasining yangi bosh murabbiyi etib tayinlandi. U 2026-yilgi futbol boʻyicha jahon chempionatiga tayyorgarlik koʻrayotgan, AQSH Meksika va Kanada bilan birgalikda oʻtkaziladigan terma jamoani boshqarishi kutilmoqda.

Pochettino bungacha Yevropaning “Tottenxem”, “PSJ” va “Chelsi” kabi yetakchi klublarini boshqargan. Uning jalb etilishi AQSH futboli uchun katta qadam sifatida qaralmoqda, chunki milliy terma jamoa asosan Oliy Liga futboli murabbiylariga tayanardi. AQSH futbol federatsiyasi prezidenti Sindi Parlou Koni Pochettinoning ishtiyoqi va innovatsion murabbiylik uslubini yuqori baholadi.

Ayni paytda dunyo reytingida 16-oʻrinni egallab turgan AQSH erkaklar terma jamoasi Yangi Zelandiyaga qarshi oʻrtoqlik oʻyini oʻtkazadi, ammo Pochettino bu oʻyinda jamoaga yordam bermaydi. Uning ilk oʻyinlari oktyabr oyida Meksika va Panamaga qarshi boʻlishi kutilmoqda.

Amerika Qoʻshma Shtatlari “Copa America” turniridagi muvaffaqiyatsiz ishtirokidan soʻng Greg Berxalter bilan xayrlashgan edi. Berxalter jamoaga 2022-yilgi jahon chempionatida 1/8 finalga chiqishga yordam bergan boʻlsa, soʻnggi natijalar uning ishdan boʻshatilishiga olib kelgandi.

Avvalroq, Oʻzbekiston shaxmat terma jamoasi bugun Trinidad va Tobago hamda Haitiga qarshi dona surishi haqida xabar bergandik.