Mamlakatimizga sayyohlar oqimini yanada oshirish uchun mehmonxona va mehmon uylarini koʻpaytirish lozimligi taʼkidlandi.

Bu borada Parkentdagi Kumushkon, Hisarak, Soʻqoq, Boshqizilsoy, Changi, Zarkent, Boyqozon mahallalarida turizm maskani tashkil etiladi.

Xonobod shahri, Boysun, Baxmal, Forish, Angren va Ohangaronda ham turizm maskanlari master rejasini tayyorlash topshirildi.

Omonxona, Maydanak kabi turistik obyektlar infratuzilmasini yaxshilashga 30 million dollar yoʻnaltirish, turizm obyektlariga olib boruvchi yoʻllar infratuzilmasiga qoʻshimcha 200 milliard soʻm ajratish qaror qilindi.

Yoʻllarni taʼmirlash bilan birga, ular atrofida kompleks xizmatlarni rivojlantirishda yangicha yondashuv boʻladi.

Turizm obyektiga olib boradigan qaysi yoʻl taʼmirlanayotgan boʻlsa, oʻsha yoʻl boʻyida savdo va servis shoxobchalarini joylashtirish boʻyicha master rejalari ishlab chiqiladi va tadbirkorlarga beriladi, aholi va turistlar uchun qulay marshrutlar ishlab chiqilib, jamoat transporti yoʻlga qoʻyiladi, xostel va mehmon uylari tashkil qilinadi.