Foto: Prezident matbuot xizmati

Kontrakt boʻyicha harbiy xizmatchilar va serjantlarning ish haqi 10 foizga, hududiy mudofaa organlarining harbiy boʻlmagan xodimlari mehnatiga haq toʻlash esa joriy yilda 20 foizga, kelgusi yilda yana 50 foizga oshiriladi. Ushbu vazifa va imkoniyatlar Prezident Shavkat Mirziyoyev raisligida oʻtkazilgan Xavfsizlik kengashi yigʻilishida belgilab olindi.

Qayd etilishicha, harbiy xizmatchilarning xizmat va turmush sharoitlari yanada yaxshilanadi. Xususan, harbiy xizmatchilar, ularning oilalari va harbiy pensionerlarni ijtimoiy himoya qilishga alohida eʼtibor qaratiladi. Bunda:

• 1-apreldan boshlab ofitserlarning koʻp yillik xizmati uchun ustama haqi 2 baravarga oshiriladi;

• kontrakt boʻyicha harbiy xizmatchilar va serjantlarning ish haqi 10 foizga oshiriladi;

• hududiy mudofaa organlarining harbiy boʻlmagan xodimlari mehnatiga haq toʻlash joriy yilda 20 foizga, kelgusi yilda yana 50 foizga oshiriladi;

• 30-yildan ortiq ish stajiga ega boʻlgan harbiy xizmatchilarga pensiya hisoblashda hisobga olinadigan pul taʼminoti miqdori 75 foizdan 100 foizgacha oshiriladi;

• maʼnaviy-maʼrifiy tarbiya maqsadida joriy yilda harbiy qism va muassasalar 1 million nusxada badiiy adabiyotlar bilan taʼminlanadi;

• armiyada sportni rivojlantirish davom ettiriladi, jumladan, yoshlarning qiziqishiga javob beradigan zamonaviy yoʻnalishlar joriy etiladi;

• yoshlarni vatanparvarlik ruhida tarbiyalash, bunda raqamli makon xususiyatlarini hisobga olish muhimligi taʼkidlandi.