Oʻzbekiston “Milliy tiklanish” demokratik partiyasi Markaziy kengashi raisi Alisher Qodirov shaxsiy Telegram kanalida “UzAuto Motors” tomonidan narxlarni asossiz oshirilishini toʻxtatish xususida fikr bildirdi.

Monopoliyaga qarshi kurashish qoʻmitasi raisining birinchi oʻrinbosari Bobur Karimovning aytishicha, “UzAuto Motors” tomonidan narxlarni asossiz oshirilishini toʻxtatishning bitta yoʻli bor.

“Bu — boj toʻlovlarni kamaytirish. Import qilinuvchi avtomobillarga qoʻyiladigan boj toʻlovini pasaytirish kerak. Agar raqobat boʻlsa, ularni tekshirishga ham hojat qolmaydi. Raqobatning oʻzi hammasini joy-joyiga qoʻyadi. Agar shu narsa hal boʻlmasa, «UzAuto Motors” ishini har yili koʻrib chiqishimiz, sudda yutishimiz ham mumkin. Biroq bu natija bermaydi, buning davosi — bozorda raqobatni paydo qilish», — dedi Karimov.

Qodirovning fikricha, boshidan buyon takrorlanib kelayotgan fikr aynan shu. “Yoʻnalish ham aynan shu: Oʻzbekistonni Jahon savdo tashkilotiga aʼzoligi orqali aynan shu raqobat muhitini shakllantirish ustida ishlanmoqda, tayyorgarlik koʻrilmoqda. Shu fikrga kelish uchun shuncha shovqin, shuncha populizm... Kimlardir mashhurroq boʻlgandir, Oʻzbekiston yutmadi”, deb yozdi  “Milliy tiklanish” partiyasi yetakchisi.