Maktab – bu moʻjiza, kitob, ustozlar oʻtadigan har bir dars

Foto: Yunus Boʻriyev, Akmal Muhammadov/“Xalq soʻzi”

Bugun mamlakatimizning barcha maktablarida “Vatan uchun, millat uchun, xalq uchun!” shiori ostida birinchi qoʻngʻiroq tadbirlari boʻlib oʻtdi. 1-sinf oʻquvchilari ilk bor maktabga qadam qoʻydi.

Respublikamiz boʻylab barcha maktab hovlilari bayramona kayfiyatga burkandi. “Xalq soʻzi” va “Narodnoye slovo” gazetalari tahririyati fotomuxbirlari ushbu unutilmas kunni kamera obyektiviga muhrladi.

Maktabgacha va maktab taʼlimi vazirligi maʼlumotlariga koʻra, 2025−2026 oʻquv yilida Oʻzbekiston boʻylab 10 ming 193 ta maktabga 6 million 754 ming 813 nafar oʻquvchi borgan. Ularning 720 ming nafari birinchi sinf oʻquvchilaridir.

Keyingi yillarda maktablarimiz qiyofasi tubdan oʻzgarib, ular tom maʼnoda Yangi Oʻzbekiston timsoliga aylanib bormoqda. Mamlakatimizda taʼlim-tarbiya jarayonlari tobora takomillashib borayotgani, har yili koʻplab yangi oʻquv maskanlari barpo etilayotgani, ularning moddiy-texnik bazasi mustahkamlanib, maktab ishi umumxalq harakatiga aylangani – keyingi davrda erishgan eng katta yutuqlarimizdan biri, desak, ayni haqiqatni aytgan boʻlamiz.

Bugun birinchi sinfga qadam qoʻygan 720 ming nafardan ortiq oʻquvchilarga 12 nomdagi oʻquv qurollaridan iborat “Prezident sovgʻasi” tantanali tarzda topshirildi.

Shuni alohida taʼkidlash kerakki, 2025-yilning oʻzida jami 440 ta maktabda va 226 ta maktabgacha taʼlim tashkilotida qurilish-taʼmirlash ishlari olib borilmoqda. Natijada maktablarga qoʻshimcha 115 dan ortiq yangi oʻrinlar yaratilib, mavjud 100 mingdan ortiq oʻrinlar zamonaviy qiyofaga keltiriladi.

Yangi oʻquv yilidan barcha taʼlim tashkilotlarida haftaning har dushanba kuni “Kelajak soati” darslari tashkil etilib, zarur qoʻllanmalar milliytarbiya.uz platformasi orqali yetkazilishi hamda “bogʻcha –maktab – oliy taʼlim” tizimida yagona gʻoyaviy tarbiya tizimi yoʻlga qoʻyilishi rejalashtirilgan.