Foto: Reuters

Xitoy muzofotlari maʼmuriyatlari iyul oyi oxiri yoki avgust oyining boshiga qadar "COVID-19"ga qarshi vaksina olmagan fuqarolarga cheklovlar joriy qilmoqchi.

CNN xabariga koʻra, bunday cheklovlarni amalga kiritishga 12 ta muzofot — Sichuan, Fuszyan, Shensi, Szyansu, Szyansi, Guansi, Anxoy, Shandun, Xebey, Xenan, Chjeszyan va Ichki Moʻgʻuliston maʼmuriyatlari tayyorgarlik koʻrmoqda.

Manbada aytilishicha, mamlakatda cheklov siyosati har bir muzofotda bir-biridan farq qiladi. Masalan, Szyansida joriy yilning 26-iyuliga qadar vaksina olmaganlarning maktablar, tibbiy muassasalarga kirishni hamda jamoat transportidan foydalanishi taqiqlanadi. 

Sichuanda supermarketlar xodimlari va bozorlardagi sotuvchilar 17-iyulga qadar emlanmagan boʻlsa ishidan ayriladi. 

Guansi muzofoti rasmiylari emlanmagan ota-onalarning farzandlari maktabga kiritilmasligini maʼlum qildi. Ammo jamoatchilik gʻazabidan soʻng bu qaror bekor qilindi.

Mahalliy hokimiyatlarining emlash tezligini oshirishga boʻlgan bu intilishi Xitoy kommunistik partiyasining 2021-yilning dekabr oyiga qadar mamlakatda ommaviy immunitetni shakllantirishga erishish talabi bilan bogʻliq. Buning uchun Xitoy oʻz fuqarolarining 80-85 foizini emlashi kerak. Bu 1 milliard kishi vaksina olishi lozim, deganidir. Mahalliy OAVda xitoyliklar allaqachon 1,4 milliard doza vaksina olgani haqida maʼlumotlar tarqatgan. Ammo qancha odam toʻliq emlangani haqida aniq raqamlar yoʻq.