Hozirda “Yoshlik” kinostudiyasi tomonidan ssenariy mualliflari Sh.Subhonov, H.Jomonqulov va postanovkachi rejissyor J.Narziqulovning “Xaus” toʻliq metrajli badiiy filmi tasvirga olinmoqda.

Film davomida bugungi kunda avj olib borayotgan axborot hurujining yoshlar ongiga taʼsiri, ijtimoiy tarmoqlardan yaxshi maqsadlarda foydalanishi lozimligi toʻgʻrisida hikoya qilinadi.

Unda “Tiktok” ijtimoiy tarmogʻida ayanchli videotasvirlarni tomosha qilgan oʻsmirning oxir oqibat oʻlim bilan yakunlangan hayoti aks ettirilgan. Oʻsmir “Tiktok”dagi oʻlim bilan bogʻliq holatni oʻzi sinab koʻradi va natijada halok boʻladi.

Kinofilm qahramonining onasi bevaqt vafot etgan oʻgʻlining xunini olish uchun “tiktochi”larni izlab shaharga keladi. Mazkur film kulminasyasida esa oʻsmirning oʻlimiga asosiy sabab “tiktokchi”lar emas, balki tarbiya ekanligi yanada ayon boʻladi.

Mazkur filmning premyerasi dekabr oyi oʻrtalarida oʻtkazilishi kutilmoqda.