Kambagʻallikni qisqartirish va bandlik vazirligi tomonidan 2024-yil dekabr holatiga koʻra, oliy taʼlim muassasalari va professional taʼlim bitiruvchilarining yarmidan koʻprogʻi ish bilan taʼminlangan.

Maʼlumotlarga koʻra, 194 417 nafar oliy taʼlim bitiruvchisidan 113 856 nafari (58,6%), 147 900 nafar professional taʼlim muassasalari bitiruvchisining 74 403 nafari (50,3%) bandligi taʼminlangan.

Muddatli harbiy xizmatni oʻtab mehnat bozoriga qaytayotgan yoshlarning bandligi boʻyicha ham ishlar olib borilgan. 2024-yilda 24 545 nafar yosh xizmatni tugatgan boʻlib, ulardan:

— 17 787 nafari doimiy ish bilan taʼminlandi;

— 1 279 nafari harbiy qismlarda xizmatini davom ettirmoqda;

— 2 047 nafari oliy va oliy harbiy taʼlim muassasalariga oʻqishga qabul qilingan.

Yoshlarning bandligini taʼminlashda 8 ta asosiy instrumentdan foydalanilmoqda:

1. “Yagona milliy mehnat tizimi” orqali boʻsh ish oʻrinlariga yoʻllanmalar berish.

2. Kasb-hunar markazlarida kasbiy koʻnikmalar oʻrgatish.

3. Subsidiya ajratish orqali ijtimoiy himoyaga muhtoj yoshlarni qoʻllab-quvvatlash.

4. Jamoat ishlariga jalb etish.

5. Oilaviy tadbirkorlik dasturlari orqali imtiyozli kreditlar berish.

6. Yer maydonlarini onlayn auksion orqali ijaraga berish.

7. Ishsizlik nafaqasini toʻlash orqali yoshlarni ijtimoiy himoya qilish.

8. Xorijiy davlatlarga vaqtinchalik mehnat faoliyatiga yuborish.