Kecha, 5-oktyabr kuni Turkiya Superligasining 8-tur oʻyinlari boʻlib oʻtdi. Kun doirasidan oʻrin olgan bahsda “Istanbul Bashakshehir” klubi Izmir shahrida “Gyoztepe” jamoasi mehmoni boʻldi. Uchrashuv mezbonlarning 1:0 hisobi bilan gʻalabasi bilan yakunlandi.

Oʻyinda kiritilgan yagona golga braziliyalik hujumchi Xuan mualliflik qildi. Oldinroq aynan ushbu futbolchi penaltidan gol kirita olmagandi.

Oʻzbekiston milliy terma jamoasi sardori Eldor Shomurodov oʻyinni asosiy tarkibda boshladi va toʻliq harakat qildi. Oʻyin davomida 38-marta toʻpga tegindi. Uzatmalarining 86 foizi aniq chiqdi. Darvoza tomon 1 ta aniq zarba yoʻllay oldi. Futbolchining harakatlari “Sofascore” portali tomonidan 6,2 ballga baholandi.

Oʻzbekiston milliy terma jamoasining yana bir aʼzosi Abbosbek Fayzullayev esa 61-daqiqada zaxiradan oʻyinga qoʻshildi. Futbolchi jami 20-marta toʻpga tegindi. 81 foiz aniq uzatma amalga oshirdi. Oʻzi qatnashgan 4 ta yelkama-yelka kurashning 3 tasida gʻalaba qozondi. Abbosning harakatlari portal tomonidan 6,8 ballga baholandi.

Maʼlumot uchun, “Istanbul Bashakshehir” keyingi oʻyinini 18-oktyabr kuni oʻtkazadi. Oʻsha kuni jamoa oʻz maydonida amaldagi chempion “Galatasaray”ni qabul qiladi.