Кеча, 5 октябрь куни Туркия Суперлигасининг 8-тур ўйинлари бўлиб ўтди. Кун доирасидан ўрин олган баҳсда «Истанбул Башакшеҳир» клуби Измир шаҳрида «Гёзтепе» жамоаси меҳмони бўлди. Учрашув мезбонларнинг 1:0 ҳисоби билан ғалабаси билан якунланди.

Ўйинда киритилган ягона голга бразилиялик ҳужумчи Хуан муаллифлик қилди. Олдинроқ айнан ушбу футболчи пенальтидан гол кирита олмаганди.

Ўзбекистон миллий терма жамоаси сардори Элдор Шомуродов ўйинни асосий таркибда бошлади ва тўлиқ ҳаракат қилди. Ўйин давомида 38 марта тўпга тегинди. Узатмаларининг 86 фоизи аниқ чиқди. Дарвоза томон 1 та аниқ зарба йўллай олди. Футболчининг ҳаракатлари «Sofascore» портали томонидан 6,2 баллга баҳоланди.

Ўзбекистон миллий терма жамоасининг яна бир аъзоси Аббосбек Файзуллаев эса 61-дақиқада захирадан ўйинга қўшилди. Футболчи жами 20 марта тўпга тегинди. 81 фоиз аниқ узатма амалга оширди. Ўзи қатнашган 4 та елкама-елка курашнинг 3 тасида ғалаба қозонди. Аббоснинг ҳаракатлари портал томонидан 6,8 баллга баҳоланди.

Маълумот учун, «Истанбул Башакшеҳир» кейинги ўйинини 18 октябрь куни ўтказади. Ўша куни жамоа ўз майдонида амалдаги чемпион «Галатасарай»ни қабул қилади.