Foto: Reuters

Isroil mudofaa kuchlari “Hizbulloh” harakatining Bayrutdagi shtab-kvartirasi qoʻmondonlaridan biri yoʻq qilinganini maʼlum qildi.

Manbaga koʻra, “Hizbulloh” shtab-kvartirasi qoʻmondoni Suhayl Husayn Husayniy havo kuchlari tomonidan berilgan aniq zarbada halok boʻlgan. U Erondan logistika va qurol-yarogʻ yetkazib berish hamda harakat boʻlinmalari oʻrtasida qurol taqsimoti uchun masʼul boʻlgan.

Avvalroq, Isroil Bayrutdagi “Hizbulloh” razvedka boshqarmasiga tegishli nishonlarga zarba bergan edi. Shuningdek, Isroil harbiy-havo kuchlari Livan janubi va Bekaa mintaqasidagi “Hizbulloh” manzillariga, jumladan, qurol saqlash joylari, infratuzilma obyektlari va uchirish inshootiga hujum qilgandi.

Bundan oldin Isroil mudofaa kuchlari Gʻazo sektoridagi Dayr al-Bala shahridagi maktab va masjidga havodan zarba bergandi. Maʼlumotlariga koʻra, bu binolarda Falastinning “HAMAS” harakatining qoʻmondonlik markazlari joylashgan.

Bungacha Isroil hujumlari orqali Hasan Nasrullohning merosxoʻri sifatida koʻrilgan Hoshim Safiy ad-Din ham yoʻq qilingani haqida xabarlar tarqalgandi. Hozir bu maʼlumot oʻz tasdigʻini topgani yoʻq.