Фото: Reuters

Исроил мудофаа кучлари “Ҳизбуллоҳ” ҳаракатининг Байрутдаги штаб-квартираси қўмондонларидан бири йўқ қилинганини маълум қилди.

Манбага кўра, “Ҳизбуллоҳ” штаб-квартираси қўмондони Суҳайл Ҳусайн Ҳусайний ҳаво кучлари томонидан берилган аниқ зарбада ҳалок бўлган. У Эрондан логистика ва қурол-яроғ етказиб бериш ҳамда ҳаракат бўлинмалари ўртасида қурол тақсимоти учун масъул бўлган.

Аввалроқ, Исроил Байрутдаги “Ҳизбуллоҳ” разведка бошқармасига тегишли нишонларга зарба берган эди. Шунингдек, Исроил ҳарбий-ҳаво кучлари Ливан жануби ва Бекаа минтақасидаги “Ҳизбуллоҳ” манзилларига, жумладан, қурол сақлаш жойлари, инфратузилма объектлари ва учириш иншоотига ҳужум қилганди.

Бундан олдин Исроил мудофаа кучлари Ғазо секторидаги Дайр ал-Бала шаҳридаги мактаб ва масжидга ҳаводан зарба берганди. Маълумотларига кўра, бу биноларда Фаластиннинг “ҲАМАС” ҳаракатининг қўмондонлик марказлари жойлашган.

Бунгача Исроил ҳужумлари орқали Ҳасан Насруллоҳнинг меросхўри сифатида кўрилган Ҳошим Сафий ад-Дин ҳам йўқ қилингани ҳақида хабарлар тарқалганди. Ҳозир бу маълумот ўз тасдиғини топгани йўқ.