Foto: Prokuratura departamenti

Toshkent shahri va Qoraqalpogʻiston Respublikasida oʻqishga kiritib qoʻyish bilan bogʻliq firibgarlik holatlari fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Qayd etilishicha, Departamentning Yunusobod tumani boʻlimi va DXX xodimlari hamkorligida Toshkent shahrida tezkor tadbir oʻtkazilgan. Unda poytaxtdagi xususiy universitet xodimi Z.O. fuqaro T.M.ning ishonchiga kirib, tanishlari orqali unga qoʻshni Qozogʻiston yoki Tojikiston davlatidagi oliy oʻquv yurtining 2 kursini oʻqib tugatganligi toʻgʻrisida soxta hujjat tayyorlab, oʻzi ishlayotgan xususiy universitetning 3 kursidan oʻqishga kiritib qoʻyishi evaziga 1,5 ming dollar olgan vaqtida ashyoviy dalillar bilan ushlangan.

Shu kabi, Departamentning Taxtakoʻpir tumani boʻlimi va IIB xodimlari hamkorligida oʻtkazilgan tezkor tadbirda fuqaro I.J. fuqaro M.O.ning ishonchiga kirib, goʻyoki yuqori lavozimda ishlovchi tanishlari orqali Nukus shahridagi Tibbiyot kollejiga oʻqishga kiritib qoʻyishi evaziga firibgarlik yoʻli bilan 1000 dollar olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qoʻzgʻatilib, tergov harakatlari oʻtkazilmoqda.