Namanganda oʻtkazilayotgan 60-Xalqaro gullar festivali jahonning 31 davlatidan kelgan OAV muxbirlari, televideniye va internet nashrlari tomonidan dunyo boʻylab yoritilmoqda. Ayni paytda nafosat bayrami tadbirlarini oʻz koʻzi bilan koʻrish uchun sayilga tashrif buyurayotgan xorijliklar safi ham ortmoqda. Zambiya Respublikasi fuqarosi Millimo Mundiyani Bobur nomli madaniyat va istirohat bogʻidagi koʻrgazmalarni maroq bilan tomosha qilayotgan pallada uchratdik.

— Oʻtgan yildan buyon Namangan muhandislik texnologiya instituti magistraturasida tahsil olyapman, — deydi M. Mundiya. – Bu shahar eng avvalo, gulu gulzorlari bilan kishini oʻziga rom etadi. Hozirgacha koʻcha va xiyobonlardagi yashil manzaralardan zavqlanib kelgan boʻlsam, minglab insonlarni oʻziga chorlagan festival hayratimni oshirdi. Buncha gullarni qanday oʻtqazib ulgurishdi ekan. Har biri oʻziga hos koʻrinish, mazmunga ega kompozitsiyalar. Son-sanoqsiz chechaklar iforiga choʻmilgan shahar. Ekzotika! Betakror koʻrinishlarni suratga tushirib, Vatanimdagi yaqinlarim, doʻstu dugonalarimga ham yuboryapman. Hammasi hayratda.

Anik va Rahik Tahirlar ham NamMTIda oʻqishadi. Aka-uka talaba mahalliy kursdoshlari bilan gul sayliga kelishni kanda qilishgani yoʻq. Suhbat chogʻida ona shaharlari — Lahorda ham gullarga havas bilan qarashlari, biroq, Namangandagi singari ekofestivalni birinchi bor koʻrayotganlari, taassurotlari bir olamligidan soʻzlashadi.

Anʼanaviy bayramga kelib, Namanganning gulchilik sanʼatiga qoyil qolayotgan xorijliklarning qimmatli qadriyatga aylangan anjumanimizga berayotgan xolis bahosini eshitganingda yanayam quvonib ketasan, kishi.

Qudratilla NAJMIDDINOV, 
“Xalq soʻzi”.