“Huquqiy mahalla” loyihasi doirasida fuqarolarning 44741 ta huquqiy muammosi hal etildi. Qonunbuzilish holatlari bo'yicha 812 ta tashkilotga  ta'sir chorasi, 265 ta holatda esa tegishli sudga da'vo arizasi kiritildi.   

— “Huquqiy mahalla” loyihasi uchun  tuman va shaharlardan  har oyda bittadan mahalla tanlab olinib, fuqarolarning kundalik hayotida uchraydigan huquqiy muammolar tahlil qilinmoqda, — deydi viloyat adliya boshqarmasi Inson huquqlarini himoya qilish sho''basi boshlig'i Bobur Norbaev. 

— Ushbu huquqiy xizmat tufayli fuqarolar huquqiy muammolariga o'z uylari, o'z mahallaridan chiqmay yechim topmoqda.  Ya'ni tuman-shahar adliya bo'limlari tomonidan  ayni loyiha asosida  xonadonlarda  o'tkazilgan xatlovlar  jarayonida fuqarolarga bevosita o'zlari yashayotgan mahallada   huquqiy ko'mak va maslahatlar berilayotir.  

E'tirof etish lozimki, Sirdaryo viloyati adliya boshqarmasi hamda tuman-shahar adliya bo'limlari fuqarolarga bepul birlamchi yuridik yordam ko'rsatish, huquqiy muammolarini mahallaning o'zida hal qilish hamda aholiga, avvalo, ijtimoiy himoyaga muhtoj fuqarolarga bepul birlamchi yuridik yordam ko'rsatish borasida izchil va samarali faoliyat olib bormoqda.  Ayniqsa, mahallalarda yagona savolnoma asosida uyma-uy yurgan holda fuqarolarning huquqiy muammolarini o'rganish, shuningdek, “mahalla yettiligi”ning tegishli elektron platformasi orqali muammolarni aniqlash va hal etish bo'yicha joriy etilgan tizim  yuqori natija bermoqda.

Ahmadali SHERNAZAROV
«Xalq so'zi».