Foto: Bosh prokuratura huzuridagi Departament

Korrupsiyaga qarshi kurashish doirasida Davlat xavfsizlik xizmati xodimlari tomonidan Bosh prokuratura huzuridagi Departament bilan hamkorlikda oʻtkazilgan tezkor tadbirda Chirchiq shahar hokimining oʻrinbosari 1 million AQSH dollari olgan vaqtida ushlandi. Bu haqda Departamentning matbuoti xabar berdi.

Maʼlum boʻlishicha, Toshkent viloyati Chirchiq shahar hokimining oʻrinbosari xizmat mavqeyidan foydalangan holda noqonuniy holatga qoʻl urmoqchi boʻldi.

Qayd etilishicha, hokim oʻrinbosari klaster shaklidagi savdo majmuasi tashkil etish uchun 40 million AQSH dollari miqdorida investitsiya kiritish sharti bilan, shahar hokimligi zaxirasidagi 20 gektar yer maydonini auksion savdoga chiqartirib, yutib berishga vaʼda bergan.

Bunda qonunbuzar 49-yil muddatga yerga egalik qilish huquqini rasmiylashtirishda koʻmaklashish evaziga 2 million AQSH dollari talab qilib, oldindan 1 million AQSH dollarini oʻzining haydovchisi orqali olgan vaqtida ushlangan.

“Hozirda xizmat mavqeyidan foydalanib, juda koʻp miqdorda pora olgan hokim oʻrinbosariga nisbatan Jinoyat Kodeksining 210-moddasi 3-qismi «a” bandi bilan jinoyat ishi qoʻzgʻatildi va qamoq ehtiyot chorasi qoʻllanildi», deyiladi xabarda.

Tergov harakatlari olib borilmoqda.

Avvalroq, qaysi yengil avtomobil Oʻzbekistonda koʻproq ishlab chiqarilgani haqida xabar berilgandi.