Eron Ekspertlar kengashi koʻpchilik ovoz bilan Mujtabo Xomaneiyni Islom Respublikasining yangi oliy rahbari etib sayladi. U yaqinda oʻldirilgan Ali Xomaneiyning oʻgʻlidir, deb xabar bermoqda Eron axborot agentliklari.

Islom inqilobi muhofizlari korpusi (IIMK) Eronning yangi oliy rahbariga sodiqlik qasamyodini qabul qildi. IIMK bayonotida aytilishicha, harakat Ekspertlar kengashi tanlovini qoʻllab-quvvatlaydi va yangi rahbarning koʻrsatmalarini bajarish yoʻlida “toʻliq boʻysunish va fidoyilikka” tayyor.

Eron prezidenti Masʼud Pezeshkiyon Mujtabo Xomaneiyning tayinlanishini “islom ummatining milliy birlikni mustahkamlashga boʻlgan intilishi ifodasi” deb atadi. Pezeshkiyonning agentliklar tomonidan keltirilgan bayonotida taʼkidlanishicha, Mujtabo Xomaneiyning saylanishi “Eron xalqi uchun qadr-qimmat va qudratning yangi davri boshlanishidan dalolat beradi”.

Maʼlumot uchun: 56 yoshli Sayid Mujtabo Xomaneiy — Eron Islom Respublikasi Oliy diniy rahbari oyatulloh Sayid Ali Xomaneiyning ikkinchi oʻgʻli. Ali Xomaneiy 28-fevral kuni Isroil va AQSHning Eronga qarshi qoʻshma operatsiyasi davomida Isroil aviazarbasi natijasida halok boʻlgan edi.

Avvalroq Donald Tramp Eronning yangi oliy rahbarini tanlash jarayonida shaxsan ishtirok etish istagini bildirgan va Ali Xomaneiy siyosatini davom ettiradigan har qanday nomzod, xususan, uning oʻgʻli ham u uchun maqbul emasligini aytgan edi.