Hindiston tomonidan boshqariladigan Kashmirda 26 nafar sayyohning oʻlimiga sabab boʻlgan hujumdan soʻng Hindiston Pokiston bilan asosiy chegara punktini yopib qoʻydi. Bu haqida “BBC News” nashri xabar berdi.

Xabarda aytilishicha, Hindiston Pokiston bilan asosiy chegara punktini yopish bilan birgalikda, koʻplab Pokiston diplomatlarini ham mamlakatdan chiqarib yuborgan hamda "Hind daryosi suvini taqsimlash" borasidagi tuzilgan shartnomaning amal qilishini ham toʻxtatib qoʻygan.

Pokiston rasmiylari Kashmirda sodir boʻlgan terakt hujumiga aloqadorligini rad etgan. Shuningdek, Hindiston tomonidan koʻrilgan taqiq choralariga javob berishni muhokama qilish uchun milliy xavfsizlik yigʻilishi oʻtkazish kerakligini taʼkidlagan.

Mazkur shafqatsiz hujumni kim amalga oshirgani haqida hozircha rasmiy maʼlumot mavjud emas. Ammo baʼzi matbuot xabarlariga koʻra, Pokiston hududidagi “Lashkar-e-Tayba” tashkilotiga aloqador guruh javobgarlikni oʻz zimmasiga olgan boʻlishi mumkin.

Hindiston bosh vaziri Narendra Modi ushbu terakt masalasida xavfsizlik rahbarlari bilan muzokaralar oʻtkazish uchun xorijiy safarini bekor qilgan.

Maʼlumot uchun, Hindiston ham, Pokiston ham daʼvo qiladigan Kashmir hududi oʻnlab yillar davomida Hindiston boshqaruvi ostida boʻlgan. Shu yillar mobaynida mahalliy aholi vakillari Hindiston boshqaruviga qarshi koʻplab norozilik namoyishlari oʻtkazib kelgan, biroq shu vaqtga qadar sayyohlarning hujumga uchrashi kuzatilmagan edi.