Foto: Prezident matbuot xizmati

Prezidentning “Oʻzbekiston Respublikasi Prezidentining ayrim qarorlariga harbiy xizmatchilarni ijtimoiy himoya qilishni kuchaytirishga qaratilgan oʻzgartirish va qoʻshimcha kiritish toʻgʻrisida”gi qaroriga asosan harbiy xizmatchilarga bir qator imtiyozlar beriladi. Bu haqida “Huquqiy axborot” kanalida maʼlum qilindi.

Unga koʻra, 2025-yil 1-martdan harbiy xizmatchilarga turarjoyni ijaraga olganlik (ijarada turganlik) uchun toʻlanadigan har oylik pul kompensatsiyasi miqdori 20 foizga oshirilishi nazarda tutilgan.

Shuningdek, 2025-yil 1-iyundan qonunchilik hujjatlariga muvofiq tasdiqlanadigan ipoteka kreditlarini ajratish koʻrsatkichlari asosida uy-joy bilan taʼminlanadigan, kalendar hisobida 10-yildan ortiq harbiy xizmatni oʻtagan harbiy xizmatchilarga turarjoy sotib olish (qurish) uchun ipoteka krediti olinishida ajratiladigan dastlabki badal miqdori uy-joy hisoblangan qiymatining 35 foizi miqdorida belgilanadi.

Bundan tashqari, 2025-yil 1-martdan yil yakunigacha Qurolli Kuchlarning kontrakt boʻyicha xizmat qilayotgan, amaldagi sarf-xarajatlar doirasida turarjoy bilan taʼminlanmagan oddiy askar, serjant va ofitserlar tarkibidagi harbiy xizmatchilariga turarjoyni ijaraga olganlik (ijarada turganlik) uchun:

• Toshkent shahrida – BHMning 4,8 baravarigacha;
• Nukus shahri va viloyatlar markazlarida – BHMning 3,6 baravarigacha;
• boshqa shaharlar, tuman markazlari va aholi punktlarida BHMning 2,4 baravarigacha miqdorda har oylik pul kompensatsiyasi toʻlovlari toʻlab beriladi.

“Oila aʼzolari 3 kishi va undan ortiq boʻlgan taqdirda harbiy xizmatchilarning ushbu pul kompensatsiyasi miqdorlari 50 foizga oshiriladi”, deyiladi xabarda.