Foto: Sport vazirligi

Misrda Yangi Oʻzbekiston uchun tarixiy natija qayd etildi. Gulshan Alimardonova karate sport turi boʻyicha Jahon chempioni boʻldi!

Ayni kunlarda Misr poytaxti Qohirada karate WKF boʻyicha Jahon chempioni boʻlib oʻtmoqda. Ushbu musobaqada Oʻzbekiston terma jamoasi aʼzolari ham munosib ishtirok etib, ketma-ket tarixiy natijalarga erishib kelmoqda.

Xususan, bugun, 30-noyabr kuni -50 kilogramm vaznda final yoʻllanmasini qoʻlga kiritgan Gulshan Alimardonova chempionatning oltin medali uchun kechgan jangda Malayziya vakili Shaxmalarani Chandrandan ustun keldi. Bu bilan Oʻzbekiston karate tarixida ilk bor ayol sportchi Jahon chempion boʻldi.

Shu paytga qadar jahon chempionatida hamyurtimiz Dostonbek Otabolayev oltin medalini qoʻlga kiritgan boʻlsa, endi Gulshan Alimardonova ham oʻz nomini tarixga yozdirib qoʻydi.

Shuningdek, bugun Abdulvahob Rashidov karate WKF boʻyicha jahon chempionati bronza medalini qoʻlga kiritdi. Bu natija orqali u Oʻzbekiston delegatsiyasi hisobiga ushbu chempionatdagi ikkinchi medalni yozib qoʻydi.

Mazkur yutuq yurtimiz karatesi tarixida alohida sahifa ochib, sportchilarimizning jahon arenalaridagi salohiyati yildan yilga ortib borayotganini yana bir bor tasdiqladi.

Maʼlumot uchun, ushbu musobaqada 86 ta davlatning 380 nafardan oshiq mahoratli karatechilari qatnashmoqda.