AQSH kongressidagi respublikachilar tomonidan Donald Tramp prezidentlikka kelganidan soʻng Grenlandiyani sotib olish amaliyotini koʻzda tutuvchi “Make Greenland Great Again Act” deb nomlangan qonun loyihasi ishlab chiqildi.

Bu amaldagi prezidentga inauguratsiyadan soʻng darhol Daniya bilan Grenlandiyani sotib olish boʻyicha muzokaralarni boshlash va kelishuv tuzilgach byudjet mablagʻlarini taqsimlashi uchun Kongressga murojaat qilish imkonini beradi.

Tennessi shtatidan respublikachi Endi Ogls soʻnggi yillarda Jo Bayden AQSH obroʻsini toʻkib yuborgani, Tramp esa Amerikaga yana birinchilikni qaytarish niyatidaligini bildirib, uni qoʻllashga chaqirgan.

“Amerika iqtisodiy va xavfsizlik manfaatlari endi eʼtibordan chetda qolmaydi, Vakillar palatasidagi respublikachilar Trampga Amerika xalqi manfaatlari yoʻlida muvaffaqiyat qozonishida yordam berishga tayyor”, degan Ogls.

Tramp Grenlandiya, shuningdek, Panama kanali kabi obyektlarni qoʻlga kiritish borasida jamoatchilik fikrini ham keskin oʻz tomoniga ogʻdirib bormoqda. U hattoki bu hududlarni kuch bilan tortib olish variantini bergan.

Respublikachilar “Grenlandiya xaridi”ga qattiq qiziqib qolishdi. Bunga sabab esa ushbu hudud AQSHning asosiy raqiblaridan biri boʻlgan Rossiya yaqinidagi strategik imkoniyat boʻlib tuyulayotganidir.