Andijon viloyatida faoliyat olib boruvchi, xotin-qizlarning ijtimoiy-siyosiy, madaniy-maʼrifiy nashri “Iqbol” gazetasi shu nomdagi loyihaga asos soldi. Maqsad esa yagona – fuqarolarning tenglik huquq va manfaatlarini himoya qilish, ularning hayotdagi, jamiyatdagi oʻrnini mustahkamlash!

-Bugungi kunda viloyatimizda ayollar rahbarligidagi 1,5 mingga yaqin kichik korxona va mikrofirmalar, shuningdek, 200 dan ortiq fermer xoʻjaliklari, 7 ming nafar tadbirkor va hunarmand opa-singillarimiz samarali faoliyat olib bormoqda,-deydi gazeta muharriri Faxriddin Ibaydullayev. – Amalga oshirilayotgan salmoqli ishlar natijasida respublikamiz parlamentida xotin-qizlar soni 32 foizga yetdi. Barqaror rivojlanish maqsadida 2030-yilgacha gender tenglikni taʼminlash strategiyasi amalga oshirilishi natijasida davlat va jamiyat boshqaruvida ayollar ulushi 35 foizdan ortdi.

Z. M. Bobur nomli viloyat axborot-kutubxona markazida boʻlib oʻtgan taqdimotda loyiha doirasida amalga oshirilishi lozim boʻlgan vazifalar xususida fikr yuritildi.

-Gender tenglik deganda, koʻpchilik xotin-qizlar manfaati va huquqlarini himoya qilishni tushunadi,-deydi Andijon davlat tibbiyot instituti rektorining xotin-qizlar masalalari boʻyicha maslahatchisi Gulxayo Xolmatova. -Aslida esa bu fuqarolarning tenglik huquqlari demakdir. Biz nafaqat, opa-singillarimizning, balki, erkaklarning manfaatlarini himoya qilishimiz, qaynona va kelinlar oʻrtasidagi tenghuquqlilikni taʼminlashimiz kerak. Buning uchun ushbu loyihadan unumli foydalanishimiz kerak.

Taqdimotda taʼkidlanishicha, gazetada ushbu loyiha davomida 5 oy mobaynida mavzuga doir 19 ta maxsus sahifa chop etiladi. 5 ta oliy oʻquv yurtlarida seminarlar tashkil etilib, “Biz gender tengligi haqida nimalarni bilamiz?” mavzusida ijodiy ishlar tanlovi boʻlib oʻtadi.

Saminjon HUSANOV, ”Xalq soʻzi”.