Fransiya prezidenti Emmanuel Makron Birlashgan Millatlar Tashkiloti Bosh Assambleyasining 80-sessiyasida mamlakatining Falastin davlatini rasman tan olganini maʼlum qildi.

“Yaqin Sharqda tinchlik oʻrnatish va isroilliklar hamda falastinliklar oʻrtasida adolatli kelishuvga erishish maqsadida Fransiya bugun Falastin davlatini tan oldi”, — dedi Makron.

Prezidentning taʼkidlashicha, Fransiya elchixonasi Gʻazo sektorida oʻt ochish toʻxtatilgandan va barcha garovda qolgan shaxslar ozod etilgandan soʻng ochilishi mumkin. Shuningdek, Parij xalqaro missiya tarkibida vaziyatni barqarorlashtirishda ishtirok etishga, Yevropa Ittifoqi bilan hamkorlikda falastinlik xavfsizlik kuchlarini tayyorlash va jihozlashga tayyorligini bildirdi.

Makron arab va musulmon davlatlarini ham Isroilni tan olishga va unga nisbatan normal munosabatlar oʻrnatishga chaqirdi.

AFP maʼlumoticha, 22-sentyabr kuni Nyu-Yorkda oʻtadigan Bosh Assambleya doirasida yana oʻnta davlat Falastinni tan olish qarorini eʼlon qilishi kutilmoqda.

Fransiyadan keyin Belgiya bosh vaziri Bart de Vever va Lyuksemburg bosh vaziri Lyuk Friden ham Falastin davlatini tan olganini maʼlum qildi.