Shu kunlarda ijtimoiy tarmoqlarda Fargʻonadagi sirkda arqon uzilib ketishi oqibatida dorboz boshi bilan yerga tushgani va vafot etgani haqidagi xabar tarqaldi.

SSV Matbuot xizmati vaziyatga oydinlik kiritish maqsadida viloyat Sogʻliqni saqlash boshqarmasi bilan bogʻlandi. Maʼlum boʻlishicha, haqiqatan ham shu yilning 23-fevral kuni soat 19:25 ga yaqin dorbozlik bilan shugʻullanuvchi E. ismli fuqaro dordan yiqilishi natijasida jarohatlanib, Respublika shoshilinch tez tibbiy yordam ilmiy markazi Fargʻona filialiga olib kelingan.

Markaz mutaxassislari uni zudlik bilan tibbiy koʻrikdan oʻtkazishgan. Bemorga «Oʻng peshona va burun boʻshligʻi suyaklarining parchalanib sinishi. Bosh miya lat yeyishining ogʻir darajasi. Bosh miya oʻng yarim shari peshona boʻlagi epidural gematomasi. Subaroxnaidal qon quyilishi. Pnevmotsefaliya. Bosh yumshoq toʻqimalari lat yeyishi va teriosti gematomasi» tashxisi qoʻyilgan va bemorda zudlik bilan jarrohlik amaliyoti oʻtkazilgan.

Markaz mutasaddilarining maʼlum qilishicha, bemorning ahvoli barqaror boʻlib, hozirda neyroreanimatsiya boʻlimida malakali mutaxassislar nazoratida belgilangan standartlar boʻyicha davo muolajalarini olmoqda.