Xalqaro atom energetika agentligi (XAEA) rahbari Rafael Grossi AQShning Eronga zarbasi tufayli boshqaruv kengashini favqulodda yigʻilishga chaqirdi.

Eron tashqi ishlar vazirligi AQShning Islom Respublikasi yadroviy inshootlariga hujumi ularning Isroilning dastlabki zarbasini rejalashtirishda ishtirok etganidan dalolat berishini qayd etib, xalqaro hamjamiyatning bu jarayonda jim turishi xalqaro xavfsizlikka jiddiy tahdid solishini qoʻshimcha qilgan.

Oʻz navbatida, XAEA AQSh zarbalaridan keyin Eron yadroviy inshootlari tashqarisida radiatsiya darajasi oshgani kuzatilmaganini bildirdi. Eron Yadro xavfsizligi markazi ham radioaktiv moddalar sizib chiqmaganini tasdiqladi.

AQSh zarbalaridan keyin Eron Isroilga ilk bor “Xaybar Shekan” ballistik raketalari bilan zarba berdi. Bu safar Isroildagi biologik tadqiqot markazi va qoʻmondonlik markazlari joylashgan Ben Gurion aeroportiga hujum qilingan.

“Amaliyotda Islom inqilobi qoʻriqchilari korpusi (IIQK) uchinchi avlod — “Xaybar Shekan” koʻp zaryadli ballistik raketasini birinchi marta foydalandi va bu orqali aniqroq, halokatliroq va samarali zarba berish uchun yangi va kutilmagan taktikalar qoʻllanildi”, deyiladi IIQK bayonotida.

Eslatib oʻtamiz, AQSh Eronning uchta yadroviy inshootlariga zarba bergan edi.