Eron Oliy sudi hukmi bilan Isroilning «Mossad» razvedka xizmatiga ishlaganlikda gumonlangan Muhsin Langarneshin qatl etildi. Hukm 30-aprel kuni ertalab amalga oshirilgan. Bu haqda IRNA axborot agentligi maʼlum qildi.

Unga koʻra, Langarneshin «Mossad» bilan 2020-yil kuzidan hamkorlik qilishni boshlagan. Shundan soʻng maxsus tayyorgarlikdan oʻtib, shu yilning dekabr oyida ilk vazifasini bajargan.

Maʼlumotlarga koʻra, u Isroil razvedkasi xodimlari bilan yaqindan hamkorlikda boʻlib, 2022-yil 22-mayda Islom inqilobi muhofizlari korpusi polkovnigi Hasan Sayyod Hodaiyning oʻldirilishida ham ishtirok etgan.

Bundan tashqari, Langarneshin Isfahondagi Mudofaa vazirligiga qarashli sanoat markaziga hujum qilish uchun reja tuzish, agentlik uchun aloqa vositalarini taʼminlash, operatsion maqsadlarda transport vositalarini sotib olish va oʻzgartirish, Isroil zobitlaridan Eron ichidagi agentlarga mablagʻlarni oʻtkazish va bir nechta viloyatlarda xavfsiz uylarni ijaraga berish bilan shugʻullangan.

U tergov davomida oʻz aybiga iqror boʻlgani aytilmoqda.

Taʼkidlash joiz, 2024-yilda dunyoning 15 ta davlatida 1518 kishi qatl etildi.