Эрон Олий суди ҳукми билан Исроилнинг «Mossad» разведка хизматига ишлаганликда гумонланган Муҳсин Лангарнешин қатл этилди. Ҳукм 30 апрель куни эрталаб амалга оширилган. Бу ҳақда IRNA ахборот агентлиги маълум қилди.

Унга кўра, Лангарнешин «Mossad» билан 2020 йил кузидан ҳамкорлик қилишни бошлаган. Шундан сўнг махсус тайёргарликдан ўтиб, шу йилнинг декабрь ойида илк вазифасини бажарган.

Маълумотларга кўра, у Исроил разведкаси ходимлари билан яқиндан ҳамкорликда бўлиб, 2022 йил 22 майда Ислом инқилоби муҳофизлари корпуси полковниги Ҳасан Сайёд Ҳодаийнинг ўлдирилишида ҳам иштирок этган.

Бундан ташқари, Лангарнешин Исфаҳондаги Мудофаа вазирлигига қарашли саноат марказига ҳужум қилиш учун режа тузиш, агентлик учун алоқа воситаларини таъминлаш, операцион мақсадларда транспорт воситаларини сотиб олиш ва ўзгартириш, Исроил зобитларидан Эрон ичидаги агентларга маблағларни ўтказиш ва бир нечта вилоятларда хавфсиз уйларни ижарага бериш билан шуғулланган.

У тергов давомида ўз айбига иқрор бўлгани айтилмоқда.

Таъкидлаш жоиз, 2024 йилда дунёнинг 15 та давлатида 1518 киши қатл этилди.