Ayni kunlarda Qoraqalpog‘iston Respublikasining Ellikqal’a tumanida qator maktabgacha ta’lim muassasalari foydalanishga topshirildi.

Xususan, “Paxtachi” va “Cho‘pon” mahallalarida yangidan qurilgan 36- hamda 37-sonli davlat maktabgacha ta’lim tashkiloti ishga tushirildi.

36-DMTT qurilish loyihasining umumiy qiymati 4 mlrd 450 mln so‘m bo‘lib, ushbu ta’lim maskanining ochilishi bilan hududdagi bolalarning maktabgacha ta’limga qamrov ko‘rsatkichi qariyb 78 foizga yetkazildi.

Yangi qurilib foydalanishga topshirilgan 37- maktabgacha ta’lim tashkiloti 90 o‘rinli bo‘lib, uning ishga tushirilishi mahalla hududida qamrov darajasini 65,4 foizdan 78 foizga yetkazdi.

Yana bir quvonchli voqea sifatida tumandagi “Qilchinoq” ovul fuqarolar yig‘inida davlat-xususiy sheriklik asosida "Sapargul, Dilfuza, Shirinay" maktabgacha ta’lim tashkiloti tashkil etildi.

Tumanning "Oltin yog‘och" aholi yashash hududida joylashgan mazkur loyihaning umumiy qiymati 5 mlrd so‘mdan ziyod bo‘lib, maskanda bolalarning ta’lim-tarbiya olishlari uchun barcha zarur sharoitlar yaratilgan.