Eksternat tartibida yakuniy davlat attestatsiyasida ishtirok etish uchun arizalar joriy yilning 1-fevralidan qabul qilinadi. Bu haqida Taʼlim nazorati Telegram-kanali maʼlumot berdi.

Unda aytilishicha, 2025-2026-oʻquv yilida eksternat tartibida yakuniy davlat attestatsiyasi oʻtkaziladigan maktablar belgilangan.

Vazirlar Mahkamasining tegishli qarori bilan tasdiqlangan Reglament ga muvofiq, eksternat tartibida yakuniy davlat attestatsiyasida ishtirok etish uchun arizalar:

• joriy yilning 1-fevralidan 1-apreliga qadar (shu kuni ham) Yagona interaktiv davlat xizmatlari portali «my.gov.uz» orqali qabul qilinadi.
• 9-sinf uchun — tegishli yilda 17 yoshga toʻladigan;
• 11-sinf uchun — 19 yoshga toʻladigan va undan katta yoshdagi majburiy umumiy oʻrta taʼlimga jalb qilinmagan fuqarolar ariza berishlari mumkin.

Ariza berish uchun maktab yoki vazirlikning hududiy boʻlinmalariga borish shart emas. Mazkur davlat xizmati bepul amalga oshiriladi.

Maʼlumot uchun, fuqarolar hozirda doimiy (yoki vaqtinchalik) yashayotgan hududdagi eksternat maktabga onlayn ariza yuborishlari mumkin.