YXHTning Oʻzbekistondagi loyihalari koordinatori Oliy Majlisning Inson huquqlari boʻyicha vakili (Ombudsman) hamda Xalqaro taraqqiyot va odil sudlov markazi (CDJI) bilan hamkorlikda ozodlikdan mahrum etish muassasalarida monitoringni amalga oshirish masalalariga bagʻishlangan ikki kunlik trening oʻtkazdi.

Treningning maqsadi qiynoqlarning oldini olish va huquqbuzarliklarni aniqlashda monitoring tashriflarining roli va vazifalarini tushunishni taʼminlash, shuningdek, bunday tashriflarni rejalashtirish va oʻtkazish boʻyicha xalqaro amaliyotni oʻrganishdir. Tadbirda Ombudsman devoni xodimlari, nodavlat notijorat tashkilotlari va fuqarolik jamiyati institutlarining vakillari ishtirok etdi.

Interaktiv mashgʻulotlarni oʻz ichiga olgan ikki kunlik trening davomida ishtirokchilar monitoring tashriflarini rejalashtirish va oʻtkazish, dalillarni toʻplash va tahlil qilish, shuningdek, jazoni ijro etish muassasalari maʼmuriyati va u yerda saqlanayotgan shaxslar bilan suhbatlar oʻtkazishning samarali usullari bilan tanishdilar. Hisobotlarni xalqaro standartlarga muvofiq tayyorlash, amaliy tavsiyalarni shakllantirish va ijrosini taʼminlashga alohida eʼtibor qaratildi.

Tadbirda harakatlanish erkinligi cheklangan shaxslar saqlanadigan yopiq muassasalarga monitoring tashriflari davomida qoʻllash uchun moʻljallangan metodologiya taqdim etildi. Amaliy topshiriqlar va guruh muhokamalari monitoring tashriflarini rejalashtirishni va ularni keyinchalik oʻtkazish jarayonida ilgʻor tajribalarni yanada chuqurroq oʻzlashtirishga yordam berdi.

Ushbu trening 2006-yildan buyon davom etib kelayotgan YXHT va Ombudsmanning Oʻzbekistondagi vakolatxonasi oʻrtasidagi koʻp yillik hamkorlikning mantiqiy davomi boʻlib, jazoni ijro etish muassasalariga monitoring tashriflari sohasidagi salohiyatni mustahkamlash, shuningdek, ushbu sohada kompleks yondashuvlarni ishlab chiqishga qaratilgan.