“Brand Finance” kompaniyasi “2024 Football 50” — dunyoning eng qimmat futbol klublari reytingini eʼlon qildi. Unda Ispaniyaning “Real Madrid” klubining tarkibi 1,842 milliard yevroga baholanib, birinchi pogʻonani band etdi.

2023-yilda Angliyaning “Manchester Siti” klubi ushbu reytingda yetakchilik qilgan edi. Ingliz klubining narxi tushmagan, balki koʻtarilgan. Ammo Kilian Mbappening Madridga koʻchib oʻtishi reytingda oʻzgarishga sabab boʻlgan.

Hozirda “Manchester City” 1,7 milliard bilan ikkinchi, “Barselona” esa 1,68 milliard yevro bilan uchinchi oʻrinda qayd etilgan.

Madrid klubining tarkibi oʻtgan yili 1,59 milliard yevroga baholangandi. “Real Madrid” 2010-yildan beri kuchli uchlikdan joy olib keladi va bu mutlaq rekorddir.

Shuningdek, top roʻyxatda “Manchester Yunayted” (1,528 million), “Liverpul” (1,5 milliard), “Bavariya” (1,351 milliard), PSJ (1,321 milliard), “Arsenal” (1,089 milliard), “Tottenxem” (949 million) va “Chelsi” (915 million) bor.

Ispaniya jamoalaridan “Atletiko Madrid” 566 million yevro bilan 13-oʻrinni egallab turibdi. Shuningdek, 50 talik roʻyxatda “Sevilya”, “Atletik”, “Betis”, “Valensiya” va “Vilyarreal” ham kirgan.

“Brand Power” reytingida ham “Real Madrid” ham 96,3 ball bilan peshqadamlik qilmoqda. Ushbu roʻyxatda “Liverpul” (93,7), “Manchester Siti” (92,8) va “Barselona” (92,7) klublari ham yuqori oʻrinlardan joy olgan. Brend qiymati brend egasi uni ochiq bozorda litsenziyalashdan oladigan iqtisodiy foydani ifodalaydi. “Brand Power” esa brendning raqobatchilarga nisbatan nomoddiy koʻrsatkichlarda qanchalik yaxshi ishlashini nazarda tutadi.

Avvalroq, Kilian Mbappe “Real Madrid” futbolchisi sifatida tanishtirilgandi.