Jahon sogʻliqni saqlash tashkiloti mutaxassislari dunyodagi eng halokatli yuqumli kasallik nomini maʼlum qildi. Qayd etilishicha, COVID-19 rekordini sil kasalligi yangiladi.

Hisobot mualliflari 2023-yil uchun 193 mamlakat maʼlumotlarini tahlil qildi. Natijalar shuni koʻrsatdiki, 1,25 million kishi sil kasalligidan, 320 ming kishi esa koronavirusdan vafot etgan.

2023-yilda 10,8 million kishi sil kasalligiga chalingan, bu bir yil avvalgidan (10,7 million) biroz koʻp. Bu koʻrsatkichining 56 foizi beshta mamlakatga toʻgʻri keladi. Xususan Hindiston, Indoneziya, Xitoy, Filippin va Pokiston.

Sil kasalligi Mycobacterium tuberculosis patogen bakteriyasidan kelib chiqadi. Uni 85 foiz hollarda davolash mumkin. Ammo davolanmaslik 50 foiz holatgacha oʻlimga olib kelishi mumkin.

“2030-yilgacha sil kasalligi epidemiyasini tugatish uchun shoshilinch choralar koʻrish kerak”, deydi ekspertlar.

Hisobotda, shuningdek, dunyoda sil kasalligidan oʻlimlar soni asta-sekin kamayib borayotgani qayd etilgan.

Hozirda oltita yangi vaksinaning 3-bosqich klinik sinovlari davom etmoqda. JSST veb-saytining xabar berishicha, besh yil ichida davolash boʻyicha yangi koʻrsatmalar yoki dorilar eʼlon qilinishi mumkin.