Oliy Majlis Qonunchilik palatasining navbatdagi majlisida jinoyat ishini yuritish chogʻida shaxsni qiynoqqa solish holatlarini oldini olishga qaratilgan qonun loyihasi ikkinchi oʻqishda koʻrib chiqildi.

Mazkur qonun loyihasida tergov hibsxonasiga joylashtirilishdan oldin shaxsni majburiy tibbiy koʻrikdan oʻtkazish hamda tanasida jarohat yoki shikastlanish aniqlangan taqdirda prokurorga zudlik bilan xabar berish tartibi belgilanmoqda.

Qonun loyihasidagi baʼzi oʻzgartishlar deputatlarda savollar tugʻdirdi. “Adolat” SDP deputati Zuhriddin Mavlonov 27¹-moddadagi “tibbiy xulosa” soʻzi oʻrniga “tibbiy maʼlumotnoma” soʻzini qoʻllashni taklif qildi. Shuningdek, Oʻzbekiston Liberal-demokratik partiyasi deputati Zafar Xudayberdiyev qonun loyihasida “sudlanuvchilar” subyekti aks etmaganligini taʼkidladi.

Qonunchilik palatasi Spikeri ham mazkur tanqidiy fikrlarni qoʻllab-quvvatladi. Ushbu kamchiliklar sababli qonun loyihasi deputatlar muhokamasiga qoʻyilmadi. Loyiha masʼul qoʻmitaga qayta ishlash uchun yuborildi.

Aniqlik kiritish va tuzatishlar kiritilgandan soʻng qonun loyihasi yana koʻrib chiqilishi kutilmoqda. Mazkur tashabbus qiynoqlarning oldini olishda muhim qadam boʻlishi mumkin, ammo uning aniq va ishonchli qonunchilik normalariga asoslanishi zarur.