Oʻzbekiston Respublikasining “Davlat xavfsizlik xizmati toʻgʻrisida”gi Qonuniga muvofiq, DXX vakolatlariga kiritilgan masalalar yuzasidan jismoniy va yuridik shaxslarning murojaatlarini tezkor ravishda qabul qilish maqsadida Call-markaz faoliyat yurita boshladi, deb xabar bermoqda tashkilot axborot xizmati.

Qayd etilishicha, Call-markazga 1520 qisqa raqami orqali qoʻngʻiroq qilish mumkin.

Markaz quyidagi masalalar yuzasidan murojaatlarni qabul qiladi:

• Oʻzbekiston Respublikasining konstitutsiyaviy tuzumi, suvereniteti va hududiy yaxlitligiga boʻlgan tajovuzlar haqida;
• Davlat chegarasini qoʻriqlanishi va himoya qilinishiga boʻladigan tahdidlar;
• Qurolli Kuchlar va mudofaa-sanoat majmuasida davlat xavfsizligiga boʻladigan tahdidlar;
• terrorizm, ekstremizm, uyushgan jinoiy guruhlarga oid;
• qurol-yarogʻ, giyohvandlik vositalari va psixotrop moddalarning noqonuniy aylanmasiga doir jinoyatlar haqida;
• davlat manfaatlariga tahdid soluvchi korrupsiya va iqtisodiy jinoyatlar yuzasidan;
• milliy, etnik va diniy adovatni targʻib etish;
• davlat manfaatlari va xavfsizligiga tahdid soluvchi huquqbuzarliklarning sodir etilishiga doir boshqa axborotlar.

Shu bilan birga, Jinoyat-protsessual kodeksining 345-moddasida belgilab qoʻyilgan va tergovi DXX vakolatiga kiritilgan Jinoyat kodeksining 150-163, 182, 223, 246-moddalarida nazarda tutilgan jinoyatlarga doir masalalar yuzasidan murojaatlar qabul qilinadi.

“Hurmatli fuqarolar, eslatib oʻtamizki «Jismoniy va yuridik shaxslarning murojaatlari toʻgʻrisida”gi Qonunning 38-moddasiga asosan, mazkur qonunni buzganlik, xuddi shuningdek, tuhmat va haqoratdan iborat murojaat berganlik belgilangan tartibda javobgarlikka sabab boʻladi”, deyiladi xabarda.

Taʼkidlanishicha, murojaat qilgan fuqarolarning shaxsi sir saqlanishi kafolatlanadi.