AQSHning Birmingem shahrida oʻtkazilgan XI Butunjahon oʻyinlari ham oʻz poyoniga yetdi. Nufuzli musobaqada 110ta mamlakatdan 3 600 nafardan ortiq atlet gʻoliblik uchun bahs olib borishdi.

Oʻzbekiston delegatsiyasi ushbu musobaqaga 5 nafar sportchi bilan ishtirok etdi. Hamyurtlarimiz orasida dastlab karatechimiz Doston Otabolayev tatamiga chiqdi. -75 kg vazn toifasida jang olib borgan 2021-yilgi jahon chempioni yakunda bronza medali bilan taqdirlandi.

Shuningdek, Indoneziyada oʻtgan 2018-yilgi Osiyo oʻyinlarida kumush medalga sazovor boʻlgan u-shuchi qizimiz Darya Latisheva bu gal ham shohsupaning ikkinchi pogʻonasiga koʻtarildi.

Afsuski, musobaqada badiiy gimnastikachimiz Yekaterina Fetisova, jiu-jitsuchi Bahrom Mashrapov hamda muay-tay ustasi Fanat Qahramonga biroz omad yetishmadi. Shu tariqa, delegatsiyamiz Birmingemda 1 ta kumush va 1 ta bronza medalini qoʻlga kiritdi.

Kelgusi XII Butunjahon oʻyinlari 2025-yilda Xitoyning Chengdu shahrida oʻtkaziladi.